බස්නාහිර පළාතේ කොළඹ දිස්ත්‍රික්කයේ හෝමාගම ප්‍රාදේශීය ලේකම් කොට්ඨාසයේ උඩුගහපත්තුව  ප්‍රදේශයේ  පොල්ගස්ඹ්විට නගරයට සමීපව අම්බලංගොඩ ග්‍රාමයේ සුන්දර වූ පරිසරයක  සිරිපති විද්‍යාලය පිහිටා ඇත.

ඉතිහාසය:-

      අම්බලංගොඩ ශ්‍රී සුදර්ශනාරාම විහාරස්ථාන භූමියේ 1917 දී මෙම පාසල ආරම්භ කර ඇත. එම විහාරස්ථානයේ එවකට වැඩ සිටි විහාරාධිපති දුම්බර පාලිත ස්වාමීන් වහන්සේගේ මූලිකත්වයෙන් ආරම්භ කර ඇත. වර්ෂ කිහිපයක් විවිධ අපහසුතා මධ්‍යයේ පවත්වාගෙන ගොස් ඇත. 1924 දී නැවත පාසලට ස්ථිර භූමියක් සොයා ගනු ලැබීමෙන් පසු එක් ස්ථිර ගොඩනැගිල්ලක් සාදා 1925 ඔක්තෝබර් 14 දින මෙම වර්තමාන පාසල පිහිටි භූමියේ ස්ථාපනය කරන ලදී.

      1925 ඔක්තෝබර් 14 දින පාසල ආරම්භ කිරීම සඳහා ඉඩම පරිත්‍යාග කරන ලද්දේ අගෝනිස් අබේසිංහ මහතා විසිනි.  එවකට මෙම ඉඩම බෝගහවත්ත නමින් හඳුන්වනු ලැබීය. අඩි 60 x 20 දිග හා පළලකින් යුත් පොල් අතු සෙවිලි කළ ශාලාවකින් මෙම විද්‍යාලය ඇරඹිණි.

      පාසල් භූමිය රූඩ් 03 පර්චස් 09.03 ක් විය. පසුව රජයට අයත් පර්චස් 22 ක් වූ පේෂකර්ම භූමිය පාසලට පවරා ගන්නා ලදී.

      ආරම්භක මුල් ගුරු තුමිය ලෙස ඊ. ඩී. එස්. රූපාවතී මහත්මිය කටයුතු කර ඇත. මෙම විද්‍යාලය වර්තමානයවන විට නම් ගණනාවකින් හඳුන්වා ඇත. එහි අතීතය සඳහන් කරන විට,

           1925 – 1957 දක්වා - අම්බලංගොඩ සිංහල ගැහැනු පාසල
           1957 – 1959 දක්වා - අම්බලංගොඩ බාලිකා පාසල
           1959 – 1961 දක්වා - අම්බලංගොඩ බෞද්ධ බාලිකා පාසල
           1961 – 1962 දක්වා - අම්බලංගොඩ අධ්‍යක්‍ෂ පාලිත පාසල
           1962 දී පාසල රජයට පවරා ගන්නා ලදී.
           1962 – 1968 දක්වා - අම්බලංගොඩ රජයේ අබේසිංහ පාසල
           1968 – 1986 දක්වා - අම්බලංගොඩ කනිෂ්ඨ විද්‍යාලය
           1986 - සිට අද දක්වා - අම්බලංගොඩ සිරිපති විද්‍යාලය